28. Juin 2012, par Nadja

News vom Site-Büsi

Miauh, i bis wieder z Schnüfi vor Site Alp. Itz hani gad echli plagiert, wöu Miaue chani nid so guet. Aber meischtens längts ja o, weni nume so chli gurre u raue für öppis z’ Ässä z’übercho. Meischtens gani zum Simon (so rüefe si am wisse Maa), o wener geng seit: « Nei, Büsse, itz gitz nüt. » De luegeni ne aube ganz lieb a u när git er mer äs paar vo dene feine Chärne.

 

Süsch isch immer no aus bim Aute. I schlafe itz geng im Heu im Schtau. Das isch schön weich u warm. Aber de muesi aube bi dä Chüe verbi, das macht mer mängisch chli Chummer. Di si drum schono cheibe gross.

 

Aus i auem bini aber gar nid ängschtlech, wes muess si vertribeni sogar Hünd. Woni vor äs paar Täg gmüetlech am frässe bi gsi, isch sones chlises, wiises Hündli cho u het mers wöue schtibize. Pha, vo öpperem wo nid viu grösser isch aus ig lahni mer de nüt lah nä! Drum hani gad eis d Haar gschteut u mini Zähn zeigt. Da het dä Hund Angst ka u het sech gad bim Maa versteckt. Aber so eifach lahni ne nid drvo. I bi nim no gad chli hinger nache. Nume so zur Sicherheit!

 

Da hei aui glachet u mi super gfunde. Schliesslech isch das mis Revier. Chli schpeter bini du nümme d Heldin gsi. Gli druf isch nämlech wieder sone Hund cho, aber de grad echline grössere. Fasch so gross wie die chline Chüe, wo miner Fründinne si. Muetig wini bi, hanis grad no eis probiert, ihm z zeige, wär dr Chef isch. Aber ja, är isch grad hinger mer här gsecklet u i hami müesse go verstecke. Da hei du aui Angst ka um mi. Eh ja, äs isch mer ä Lehr gsi.

 

So, itz wotti go luege, öbi no sone Muus verwütsche u süsch gani haut de ume chli go bättle zude Lüt…

 

Bis gli uf dr Site Alp (ke Angscht, i bi eigentlech lieb)

Schnüfi alias Büsle

Catégories: Blog Site Alp | Commentaires fermés