15. Août 2012, par Nadja

Dr Herbscht naht

Dr Wecker lütet u äs isch Zit zum Ufschtah. Phu, lieber dräihe i mi nomau im Bett u nütze die letschte Minute us. Aber äs nützt aues nüt, mi muess sech liide u die blute Füess ufe chaut Bode schteue. Mi merkt scho dütlech, dasses gägä Herbscht zue geit. Äs isch no fischter u früsch, u z Ufschtah geit gar nümm ring.

 

Dusse atmeni die herrlech chauti Luft i. Sofort bini wach u mini Läbensgeischter chere zu mir zrugg. D Chüe si ir gröschte Weid – marschiere isch agseit. Obe bim Hochmoor schliche Näbuschwade überem Bode. Äs isch geradezue mystisch. Immer loseni, öbi amene Ort d’Glogge vo de Chüe ghöre bimbele. Uf z Mau schtösi vor mer, glotze mi a u mache sech när ufe Wäg Richtig Schtau. I trotte hingerem letschte Chuefüdle här u beobachte wie sech dr Himmu rot, orange, gäub färbt. Churz vorem Schtau luegeni nomau zrugg. Hani äch aue verwütscht?

 

Im Schtau acho, heissts Chüe abinde, Schwänz ufbinde u Meuchmaschine bereit mache. Z Meuche geit schnäu, üser Dame gäbe nümm so viu Miuch wie im Früehsommer. Kes Wunder, ds Gras wird ja o nid immer meh. Z Burschtgras wird scho bruun, die letschte Blueme si verblüeiht u o dr Ahorn het scho erschti gäubi Bletter. Äs dütlechs Zeiche, dass dr Summer nümm so lang duuret.

 

Plötzlech wirds hell im Schtau, wöu d Sunne het übere Hoger möge. Gli simer fertig mit Meuche u äs feins Zmorge wartet. Bir letschte Chue aglangt, lehni mi no chli a sie u sinniere über die Zit wo nachem Summer chunnt. Wie schön wirds si, am Morge chönne blibe z liege, z mache wasme wott. U glich weisi scho, dass es die erschte Tage äs komisches Gfüu wird si. Mi füut sech läär u weiss fasch nid, wasme mitsech söu afah. Aber bis dert härä, geiz no ä Cher. No 30 Tag meuche, Chäs schmiere, ir Chäsi häufe u Mutschli schmiere. Zum Glück machenis ja eigentlech gärn u drum gani itz o ume drhinger…

  

Bis gli, liebi Lüt

Nadja

Catégories: Blog Site Alp | Commentaires fermés